GAZETA ALBANIA

Në shtator, Berisha bën gati ndryshimet në qeveri

Në muajin shtator, burimet bëjnë të ditur, se kryeministri Berisha do të bëjë një riformatim të kabinetit qeveritar. Sipas tyre, ky reformatim është i diktuar, jo vetëm nga performanca e disa ministrave, por edhe nga nevoja për ruajtjen e maxhorancës prej 71 votash në parlament. Pikërisht, për të siguruar një maxhorancë solide prej 71 votash, kryetarit të Partisë Demokratike i duhet të “gostisë” të gjithë aleatët, në mënyrë që maxhoranca e tij të mos varet nga “oreksi” i Lëvizjes Socialiste për Integrim. Sipas burimeve të informacionit, kryeministri Berisha pritet të afrojë në qeverisje, Partinë për Drejtësi dhe Unitet që përfaqëson kryesisht interesat e komunitetit çam. Duke i dhënë PDU-së një post ministror dhe disa poste të nivelit të dytë dhe të tretë, atëherë, Berisha siguron dy vota për maxhorancën e tij, duke e çuar pikërisht në 71 vota të sigurta, duke mos numëruar katër votat e LSI-së, parti kjo, që ka vendosur të ruaj identitetin e saj të majtë, në disa raste.
Presioni
Me afrimin e PDU-së në qeverisje Berisha arrin të krijojë një frymëmarrje për qeverisjen e tij, duke garantuar numrin e mjaftueshëm të votave për të kaluar ligjet që kërkojnë shumicë të thjeshtë, ashtu sikurse kërkon dhe projektligji i shumëdebatuar për Shërbimin Informativ Shtetëror. Po kështu, kreu i qeverisë i shpëton presionit të Lëvizjes Socialiste për Integrim, qëndrimi i së cilës rrezikoi maxhorancën në votimin e projektit për SHISH-in, duke bërë që Berisha ta tërheqë nga votimi këtë draft. Qëndrimi i Metës në parlament gjatë seancës së debatit për SHISH-in nuk ishte gjë tjetër veçse një provë force e LSI-së drejtuar Berishës, dhe me afrimin e zgjedhjeve vendore, Meta pritet që të rrisë kërkesat e tij drejtuar kreut të qeverisë dhe të koalicionit.
Ndryshimet
Por këtë, duket se e ka kuptur edhe kreu i ekzekutivit, i cili nuk po rri aspak duarkryq, por sipas burimeve po bën llogaritë për të pasur një maxhorancë solide, duke realizuar riformatimin e qeverisë. Mesohet se kreu i qeverisë do të të bëjë një rotacion të ministrave aleatë në ministritë dytësore, si dhe pritet të largojë një nga ministratë e PD-së. Kështu, sipas burimeve Berisha do të krijojë hapsira në ministri të tilla, si ajo e Mjedisit apo e Kulturës, në mënyrë që njërën prej tyre t’ia japë Partisë për Drejtësi dhe Unitet. Me afrimin e zgjedhjeve lokale është e njohur rëndësia që merr një dikaster ministror, që sigurisht është një mundësi më shumë për të shpërblyer militantët dhe elektoratin e partive. Burimet gjithashtu bëjnë të ditur se nuk është e çuditshme mundësia që Berisha t’i kërkojë Metës të bëjë një riformatim të emrave të ministrave të LSI-së në kabinetin qeveritar, duke kërkuar ndryshimin e ndonjë ministri të LSI-së. Gjithësesi të gjitha këto ndryshime flitet se do të bëhen në muajin shtator dhe deri atëherë kreu i ekzekutivit ka kohë mjaftueshëm për të reflektuar dhe vendosur.

Sabri Godo kërkon ndryshimin e pjesshëm të qeverisë

Edhe plaku i urtë i politikës dhe një prej hartuesve të Kushtetutës, Sabri Godo ka hedhur idenë e reformimit të qeverisë. Politikani Godo është i pari në sferën politike që hedh idenë e një ndryshimi të qeverisë në muajin shtator, duke sugjeruar publikisht Kryeministrin që të vlerësojë punën e ministrave. “Unë mendoj se një vit kohë ka mjaftuar për të vlerësuar punën e secilit ministër dhe ka ardhur koha të kemi një qeveri më eficiente. Duhet të përgatitemi edhe nga kjo pikëpamje për zgjedhjet vendore dhe zgjedhjet e përgjithshme”, - tha Godo. Sipas tij, punën e di mirë i zoti i shtëpisë, në rastin konkret Kryeministri. “Cili ministër ka justifikuar punën e tij dhe cili ka lënë gjërat mangët. Përshtypja ime është se riformimi i pjesshëm i kabinetit do të ishte i mirë”, - tha ai. Lidhur me çështjen nëse mazhoranca i ka apo jo numrat në Kuvend për ligjet e rëndësishme si ai i SHISH, plaku i urtë i politikës theksoi se “Berisha bëri shumë mirë që tha hajde të më votbesoni, që të shikoni nëse i kam apo jo votat. Kjo tregon se mazhoranca nuk ka rënë”. Politikani Godo ka komentuar edhe punën e dy sesioneve të para të legjislativit të 18-të. Sipas Godos, ky Parlament nuk gëzon prestigjin e duhur. “Kjo kryesisht bëhet nga përbërja e tyre. Një pjesë e deputetëve nuk janë të përgjegjshëm për rolin e tyre, merren me punë që nuk janë të tyre. Sherrxhinjtë e përhershëm i quaj si deputetë që duan të vënë veten në dukje përpara kryetarëve të tyre, për të thënë se janë të gatshëm, të vdesin për partinë. E gjitha kjo i bën dëm prestigjit të Parlamentit. Them se në zgjedhjet e ardhshme duhet që gjysma e tyre të eliminohen”, - tha ai.

30 Korrik 2010

Politike